UNEC-in Dərbənd filialının məzunları diplomlarını niyə ala bilmirlər?

Azərbaycan İqtisad Universitetinin (UNEC) Dərbənd filialının məzunları diplomlarını ala bilmirlər.

2023-2024-cü il üzrə təhsil almış maliyyə ixtisasının tələbələri bu barədə Oxu.Az-a şikayət ünvanlayıblar.

Bildirilib ki, Rusiya vətəndaşı olan tələbələr təxminən bir ay öncə diplomlarını aldıqları halda, onlar hələ də ala bilməyiblər:

"Biz 2023-2024-cü il üzrə məzun olmuşuq. İmtahanlardan da yaxşı nəticə əldə etmişik, kəsirlərimiz yoxdur. Lakin buna baxmayaraq, hələ də diplomumuzu ala bilmirik. Diplomlarımızın verilməmə səbəbi bizə maraqlıdır. Niyə Rusiya vətəndaşları ala bilir, biz isə ala bilmirik?"

Məsələ ilə bağlı UNEC-in İctimaiyyətlə əlaqələr şöbəsinin müdiri Elnarə Məmmədova Oxu.Az-a açıqlamasında qeyd edib ki, məzunlara diplomların verilməsi üçün Elm və Təhsil Nazirliyi tərəfindən diplom blanklarının gəlməsini gözləyirlər:

"Tələbələrin məzun əmrləri verilib. Elm və Təhsil Nazirliyinə də bu əmrlər göndərilib. Prosedur necədirsə, biz bu proseduru həyata keçirmişik. Hazırda Rusiya vətəndaşlarının diplomları verilib. Elm və Təhsil Nazirliyi bizə diplom blankları göndərməlidir. Onlar da araşdırma aparırlar. Araşdırmalar bitdikdən sonra diplom blankları veriləcək. Diplom blankları bizə nə vaxt gələrsə, həmin gün də imzalayıb məzunlara verə biləcəyik. Elm və Təhsil Nazirliyi deyir ki, mərhələli şəkildə araşdırma aparılır, bitdikdən sonra diplom blankları göndəriləcək.

Araşdırma detalları və qaydalarını nazirlik özü bilir. Bunu biz bilmirik. Yoxlama qaydaları nədir? Nəyi araşdırırlar? Nəyə görə araşdırırlar? Bunları ancaq nazirlik cavablaya bilər.

Dərbənd filialına qəbul Rusiya qəbul qaydalarına əsasən aparılır. Dövlət İmtahan Mərkəzi vasitəsilə aparılan qəbulla deyil. Ehtimal edirəm ki, araşdırmalar buna görədir. Yenə də hər bir halda bu barədə Elm və Təhsil Nazirliyi daha ətraflı məlumat verə bilər".

Elm və Təhsil Nazirliyindən Oxu.Az-ın sorğusuna cavab olaraq bildirilib ki, Elm və Ali Təhsil üzrə Dövlət Agentliyi tərəfindən tələbənin qəbulu, təhsil prosesi və digər məsələlər araşdırılır:

"Qeyd olunan məqamlar qanunvericiliyin tələblərinə uyğun olduğu halda diplom blankları təqdim olunur.

Qanunvericiliyin tələblərinə uyğun olmayan hallar aşkar olunduğu və Elm və Təhsil Nazirliyi tərəfindən müsbət rəy verilmədiyi hallarda diplom blanklarının təqdim olunması mümkün deyil".

Aygün Mirakif