Tanınmış isveçrəli rejissor Jan-Lui Porşe ad günündən sonra intihar etdi

İsveçrəli kinematoqraf, rejissor və ssenarist Jan-Lui Porşe ad günündən sonra intihar edib.

Oxu.Az xəbər verir ki, bu barədə "Le Temps" qəzeti məlumat yayıb.

KİV-in məlumatına görə, faciə martın 31-də, Jan-Lui 76 yaşını qeyd etdikdən iki gün sonra baş verib.

Qeyd olunub ki, ötən il rejissor ağır avtomobil qəzasına düşüb. Porşenin ətrafı onun, demək olar ki, tam sağaldığını və səhhətindən heç bir şikayətinin olmadığını bildirib.

Jan-Luinin yaxınları onun maddi çətinliklər səbəbindən intihar etdiyini irəli sürüblər. Rejissor Roman Polanskinin "The Palace" filminin prodüseri olmasına razılıq verib və bu onun üçün həlledici qərar olub. Filmin istehsalı 17 milyon avroya başa gəlib və Porşe çəkilişləri başa çatdırmaq üçün borca ​​girməli olub. Bununla belə, "The Palace" dünya miqyasında bir milyondan az gəlir əldə edib ki, bu da böyük maliyyə uçurumuna gətirib çıxarıb.