"SOCAR Green"in direktoru: "Çinli tərəfdaşlarla dəniz küləyindən istifadə imkanlarını araşdırırıq"

"Azərbaycan qlobal bərpa olunan enerji sahəsində əsas oyunçuya çevrilmək yolundadır".

Oxu.Az "Report"a istinadən xəbər verir ki, bunu Azərbaycan Dövlət Neft Şirkətinin (SOCAR) törəməsi olan "SOCAR Green" şirkətinin direktoru Elmir Musayev Bakıda keçirilən Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclaslarında çıxışı zamanı bildirib.

"Biz inkişaf mərhələsində olan 1.4 giqavat bərpaolunan enerji layihələrinə malikik. Sözsüz ki, bizim planlaşdırma mərhələsində daha çox layihəmiz var və vaxt gəldikcə onları nümayiş etdirəcək və elan edəcəyik. Bu da Azərbaycanın sıfır emissiya hədəflərinə çatmasına dəstək göstərəcək. Məqsədlərimizə təmiz enerji layihələrinin, o cümlədən günəş, külək, dəniz küləyi, karbon tutulması, saxlanması və istifadəsi, yaşıl enerji, yaşıl hidrogen və enerji saxlaması üçün səmərəli həllər və digər aşağı karbonlu həllərin inkişafı və idarə edilməsi daxildir", - deyə o vurğulayıb.

Onun sözlərinə görə, şirkət Çindən olan tərəfdaşları ilə birlikdə dəniz küləyindən istifadə ilə bağlı imkanları araşdırır: "Bu da Avropa bazarlarına elektrik enerjisini, "yaşıl elektrik enerjisi"ni ixrac etməyə imkanı verəcək və "Yaşıl Dəhliz" layihəsinin həyata keçirilməsini dəstəkləyəcək. "SOCAR Green" olaraq biz Azərbaycanın, regionun dekarbonizasiyaya, sıfır emissiya hədəflərinə çatmasını dəstəkləmək üçün əlimizdən gələni edəcəyik".

Xatırladaq ki, ötən ilin noyabr ayında Füzuli rayonunda 160 MVt gücündə günəş enerjisi layihəsi üzrə Energetika Nazirliyi, "China Energy Overseas Investment Co. Ltd." şirkəti və "SOCAR Green" MMC arasında İcra Müqaviləsi imzalanıb.