"Apple" və "Google"u qanqster şirkətlər adlandırdılar

"Epic Games"in baş direktoru Tim Suini texnologiya nəhəngləri "Apple" və "Google"u kəskin tənqid edərək, onların biznes modellərini cinayət təşkilatlarınınkı ilə müqayisə edib.

Oxu.Az xəbər verir ki, o, məşhur "Y Combinator" vençur fondunun tədbirində çıxışı zamanı səs-küylü açıqlamalar verib.

"Kədərli həqiqət ondan ibarətdir ki, "Apple" və "Google" artıq vicdanlı, qanuna tabe olan şirkətlər deyillər. Onlar qanqster tipli biznes aparırlar, istədikləri hər şeyi edirlər. Əgər cərimənin qeyri-qanuni işlərindən əldə edilən gəlirdən daha ucuz olacağını düşünürlərsə, həmişə qeyri-qanuni işlərini davam etdirir və cəriməni ödəyirlər", - Suini bildirib.

"Epic Games"in rəhbəri "Apple" və "Google"un hərəkətlərinin istifadəçilərin "Epic Games Store"a girişini necə məhdudlaşdırdığına və tərtibatçılarla əməkdaşlığa maneələr yaratdığına dair bir neçə nümunə verib. Belə ki, "Google" tətbiqi "Android" cihazlarına quraşdırarkən "naməlum mənbələrdən" mümkün risklər barədə xəbərdarlıqlar göstərir və istifadəçilər arasında inamsızlıq yaradır. Suininin fikrincə, bu, potensial müştərilərin 50-60%-nin quraşdırmadan imtina etməsinə səbəb olur.

Suini qeyd edib ki, onlar "Apple" ilə münaqişənin maliyyə nəticələrindən qorxduqları üçün əməkdaşlıqdan imtina edirlər.

"Epic Games"in rəhbərinin sözlərinə görə, bu cür bazar mexanizmləri sektorda əlavə təzyiq yaradır və rəqabəti məhdudlaşdırır. Bu, təkcə "Epic Games Store"un deyil, bütövlükdə oyun sənayesinin inkişafına mane olur.