Moskvada imperator II Nikolayın kötücəsi saxlanılıb

Rusiya paytaxtı Moskvada özünü Rusiya imperiyasının sonuncu imperatoru II Nikolayın kötücəsi (nəticənin övladı, nəvəsinin nəvəsi) adlandıran 52 yaşlı Svetlana Vislobokova saxlanılıb.

Oxu.Az-ın xəbərinə görə, bu barədə "Baza" "Telegram" kanalı məlumat verib.

"Qadın özünü tarixçi, professor, qlobal siyasət üzrə rusiyalı intellektual lider, universal prosessual lider və II Nikolayın kötücəsi kimi təqdim edir. Dediyinə görə, onun çox sayda digər titul və rütbəsi, hətta psixi cəhətdən sağlam olduğuna və narkotikdən istifadə etmədiyinə dair arayışı da var", - deyə məlumatda bildirilib.

Qeyd olunub ki, Vislobokova yəhudilərə qarşı nifrət və düşmənçilik oyandırmaq ittihamı ilə saxlanılıb. O özünün "Telegram" kanalında Rusiyanın gücü, yəhudilər və geosiyasət barədə müzakirələr aparır.

2025-ci il martın 31-də Vislobokovaya qarşı "Nifrət və ya düşmənçiliyin qızışdırılması, habelə insan ləyaqətinin alçaldılması" və "Ekstremist fəaliyyətə ictimai çağırışlar" maddələri ilə cinayət işi açılıb. İstintaq hesab edir ki, qadın 2023-cü ilin avqustundan bəri ən azı 8 dəfə yəhudilərə, həmçinin onları dəstəkləyənlərə qarşı zorakılığa çağırış edib.