ABŞ-nin tariflərinə cavab olaraq Aİ daxili bazarı gücləndirmək niyyətindədir

Avropa İttifaqı (Aİ) ABŞ-nin ticarət rüsumlarına cavab olaraq Avropa Komissiyasının (AK) tənzimlədiyi daxili bazarının birliyini gücləndirəcək.

Oxu.Az-ın TASS-a istinadən məlumatına görə, bunu AK-nın rəhbəri Ursula fon der Lyayen Strasburqda Avropa Parlamentinin sessiyasında çıxışı zamanı bildirib.

O, Aİ ölkələri arasında qalan ticarət maneələrini silməyi vəd edib ki, bu da faktiki olaraq AK-nın iqtisadi imkanlarının artırılması və birlik üzvü olan dövlətlərin hökumətlərinin səlahiyyətlərinin azaldılması deməkdir.

Qeyd olunur ki, AK danışıqlar yolu ilə həll tapılmadığı təqdirdə qüvvəyə minəcək sərt cavab tədbirləri planı hazırlayıb.

"Avropa İttifaqı bu qarşıdurmaya başlamadı, biz bunu səhv hesab edirik. Lakin Aİ-nin vahid bazarını qorumaq üçün bütün vasitələri var", - deyə fon der Lyayen qeyd edib.

Onun sözlərinə görə, AK danışıqlar yolu ilə həllə yönəlib, lakin ABŞ ilə danışıqları öz bazarının həcminə, Avropa texnologiyalarına və xidmət sektoruna əsaslanaraq güc mövqeyindən aparmaq niyyətindədir.

"Avropa Komissiyası ABŞ-nin yeni tariflərini aprelin 2-də gözləyir, onlar yarımkeçiricilərə, tibbi preparatlara və ağac materiallarına tətbiq edilə bilər", - deyə fon der Lyayen bildirib.