ABŞ-nin kibertəhlükəsizlik agentliyi işçilərinin üçdə birini ixtisar edəcək

ABŞ Kibertəhlükəsizlik və İnfrastruktur Təhlükəsizliyi Agentliyi (CISA) ölkə hökumətinin dövlət işçilərinin sayını azaltmaqda davam etdiyi üçün işçilərinin üçdə birindən çoxunu itirə bilər.

Oxu.Az xəbər verir ki, bu barədə mənbələrə istinadən CBS telekanalı məlumat verib.

Qeyd olunur ki, hazırda agentlikdə təxminən 3 400 nəfər işləyir. Eyni zamanda, yaxın gələcəkdə CISA-da kütləvi ixtisarlar başlaya bilər. Dəqiq vaxt hələ məlum deyil, lakin mənbələr bunun yaxın bir neçə həftə ərzində baş verəcəyini istisna etməyiblər.

Nəşr vurğulayır ki, 1 300-ə qədər işçi ixtisara salına bilər.

Bundan başqa, ABŞ Müdafiə Nazirliyinin üç rəsmisinə istinadən verilən məlumata görə, ölkənin ordu komandanlığı şəxsi heyətin geniş miqyaslı ixtisar imkanını nəzərdən keçirir. Söhbət 90 minə yaxın insanın işdən çıxarılmasından gedir.

Hazırda ABŞ ordusunda təxminən 450 min vətəndaş xidmət edir. Kadr dəyişikliyindən sonra onların sayının 360-420 min nəfərə qədər azalacağı gözlənilir.

Materialda qeyd edilir ki, müvafiq planın hazırlanmasına səbəb ABŞ-nin müdafiə naziri Pit Heqsetin Pentaqonun büdcəsini 8% azaltmaq əmri olub.